Yr wythnos hon mae ColegauCymru yn cynrychioli sector addysg bellach Cymru yng nghyfarfod Cynghrair Colegau’r Pedair Gwlad ym Melfast.
Mae'r digwyddiad yn canolbwyntio ar y rôl hollbwysig y mae colegau yn ei chwarae mewn datblygiad economaidd rhanbarthol, gan ddod â chynrychiolwyr colegau o bob rhan o'r Deyrnas Unedig ynghyd. Mae’r cyfarfod yn gyfle i archwilio’r rôl ganolog y mae colegau’n ei chwarae fel sefydliadau allweddol sydd wrth galon yr economi. Gan ddarparu lle i rannu a dysgu ar draws y systemau gwahanol, bydd y cyfarfod yn caniatáu i golegau ddyfnhau eu dealltwriaeth o’r hyn sy’n gweithio, a gwersi i’w dysgu a’u rhannu, a sut y caiff rôl colegau eisoes ei chefnogi orau gan lunwyr polisi a’i hymgorffori mewn agendâu ehangach.
Ar hyn o bryd mae nifer o ddiwygiadau sylweddol yn y maes hwn ar draws y gwledydd, gan gynnwys sefydlu’r Comisiwn dros Addysg Drydyddol ac Ymchwil yng Nghymru a fydd yn ailwampio strategaeth, cyllid a goruwchwilio ym maes addysg ôl-16. Bydd y cyfarfod hwn felly yn gyfle amserol i rannu syniadau a dysg o’r systemau a’r arferion sefydliadol gwahanol a gynrychiolir ar draws aelodau Cynghrair Colegau’r Pedair Gwlad.
Dywedodd Cyfarwyddwr Polisi a Materion Cyhoeddus ColegauCymru, Rachel Cable,
“Rydym yn falch i fynychu’r digwyddiad hwn a gynhelir gan Met Belfast. Colegau yw’r cogiau allweddol ym mheirianwaith economaidd Cymru, ac rydym yn awyddus i ddysgu o ddulliau gweithredu mewn mannau eraill yn y DU, yn ogystal â rhannu ein profiadau yng Nghymru. Mae buddsoddi mewn addysg bellach yn cefnogi datblygiad economaidd yn uniongyrchol, ac mae’n bwysig cydnabod y rhan hollbwysig y mae colegau yn ei chwarae yn ein heconomi”.
Gwybodaeth Bellach
Four Nations College Alliance / The College of the Future
Lucy Hopkins, Rheolwr Cyfathrebu
Lucy.Hopkins@ColegauCymru.ac.uk
