Yr wythnos hon cyhoeddodd Llywodraeth Cymru ei Strategaeth Tlodi Plant Cymru 2024 newydd.
Dywedodd Prif Weithredwr ColegauCymru, David Hagendyk,
“Rydym yn croesawu’r gydnabyddiaeth gan Lywodraeth Cymru o’r angen dybryd i fynd i’r afael â lefelau acíwt a chronig tlodi plant, ond rydym yn rhannu’r siom a fynegwyd gan Gomisiynydd Plant Cymru ynglŷn â’r diffyg targedau penodol.
Bob dydd, mae colegau ledled Cymru ar y rheng flaen yn cefnogi dysgwyr, er enghraifft, darparu gwasanaethau iechyd meddwl a lles, cynnig brecwast am ddim, a darparu rhaglenni dysgu fel teulu. Mae’r dystiolaeth yn dweud wrthym fod tlodi ac amddifadedd cymdeithasol mewn plant yn gysylltiedig â thangyflawni addysgol, ac mae pobl ifanc Cymru yn haeddu’r dechrau gorau posibl mewn bywyd.
Gall colegau gael effaith drawsnewidiol ar bobl ifanc a chymunedau os ydynt yn cael eu hariannu'n ddigonol. Mae llwyddiant mewn addysg a hyfforddiant yn rhan sylfaenol o’r llwybr allan o dlodi, ac mae’n hollbwysig bod Llywodraeth Cymru yn sicrhau cyllid parhaus ar gyfer addysg bellach i alluogi colegau i barhau i gefnogi’r dysgwyr mwyaf agored i niwed yn ein cymunedau – ar gyfer cenedlaethau heddiw a chenedlaethau’r dyfodol. Bydd colegau’n parhau i wneud popeth o fewn eu gallu i gefnogi pobl ifanc i ennill y sgiliau, y cymwysterau a’r profiad sydd eu hangen arnynt i ddianc rhag tlodi”.
Gwybodaeth Bellach
Datganiad Cabinet
Datganiad Llafar: Strategaeth Tlodi Plant Cymru
23 Ionawr 2024
Rachel Cable, Cyfarwyddwr Polisi a Materion Cyhoeddus
Rachel.Cable@ColegauCymru.ac.uk
